O alcalde de Vigo, Abel Caballero, respondeu este xoves ás declaracións do presidente da Xunta, Alberto Núñez Feijóo, nas que urxía ao Goberno central a licitar canto antes a saída sur ferroviaria da cidade. Segundo o rexedor, o presidente galego “non sabe de que fala” porque esa infraestrutura é unha “aposta decidida” do Executivo de España e a súa tramitación “segue avanzando”.

O alcalde lembrou que o actual Goberno central tivo que encargar outro estudo da saída sur porque o anterior Executivo, actuando baixo a “presión” do propio Feijóo, “deixou caducar” os informes que previamente encargara o Ministerio de Fomento dirixido por José Blanco.

Abel Caballero acusou o presidente da Xunta de mostrar “un absoluto descoñecemento” das cuestións que afectan a Vigo, e apuntou que el mesmo mantivo contactos co Goberno español e co Goberno portugués para impulsar o AVE entre Vigo e Lisboa. “Segue avanzando isto”, incidiu.

Respecto diso, fixo fincapé en que a saída sur será “para alta velocidade, compatible con mercadorías”, un detalle que “Feijóo nunca di”.

AVE A MADRID

Ademais, volveu a proclamar que “nunca” tolerará que os vigueses teñan que ir a Madrid en tren por Santiago, xa que o tempo do percorrido é o mesmo ou mesmo maior que se o fixesen pola antiga liña do Miño. “A prioridade de Vigo é o AVE directo a Madrid por Cerdedo, e Feijóo non o di nunca, porque non o quere”, denunciou.

Segundo afirmou Caballero, a viaxe por Santiago é “un atraso inmenso” e “un insulto a Vigo”, despois de “todos os millóns investidos” no AVE galego.

CONEXIÓN FERROVIARIA DE BOUZAS

Por outra banda, o alcalde tamén volveu a advertir de que non permitirá que se constrúa unha conexión ferroviaria para a terminal portuaria de Bouzas “que rompa a cidade”, tal e como, aseverou, “expón Feijóo”.

Nese sentido, tras asegurar que a planta de PSA rexeitou tamén esa conexión de tren, afirmou que, se o presidente da Xunta “di isto sabendo do que fala”, terá que pedir a súa “dimisión inmediata”.

Feijóo critica que o Goberno central atrase a licitación da saída sur de Vigo con “outro estudo”