A conselleira de Infraestruturas e Mobilidade, Ethel Vázquez, manifestou que, dentro do Corredor Atlántico de mercadorías, “é imprescindible que se mellore e modernice non soamente o saída sur de Vigo cara ao Porto, senón tamén a conexión ferroviaria Vigo-Ourense“.

Así, durante unha visita este martes ás obras da estación intermodal de Vigo, demandou ao Goberno de España “máis implicación e avanzar seriamente” na execución destas melloras.

Neste sentido, Vázquez criticou que o Goberno estatal “está a ignorar” as demandas da Administración autonómica no referente a estas acometidas, que buscan “a competitividade” dos portos galegos no transporte de mercadorías.

Ante estas circunstancias, remarcou que “é imprescindible” tanto a saída sur ferroviaria de Galicia como a mellora do tramo de tren que conecta Vigo e Ourense, xa que se trata dunha “liña realmente antiga, que non corresponde ao século XXI”.

“É imprescindible máis que nunca avanzar en todos os proxectos do Corredor Atlántico de mercadorías”, insistiu, antes de lembrar que hai “oportunidade” de facelo a través dos fondos ‘Conectar Europa’ e ‘Next Generation’, “porque son candidatos perfectos todos os proxectos en materia ferroviaria que son transformadores”.