O alcalde de Vigo, Abel Caballero, avanzou este luns que o goberno local presentará en próximos días unha proposta para instalar espazos cubertos na cidade, co fin de apoiar ao sector hostaleiro na súa ocupación de zonas ao aire libre.

Caballero volveu a insistir en que é a Xunta a que ten a “obriga” e as competencias para compensar a estes negocios polas perdas derivadas das restricións pola pandemia de COVID.

O alcalde lembrou que os hostaleiros da cidade “pagan cero euros” por ter as súas terrazas ocupando espazo público e que, ademais, con motivo da crise sanitaria, o Concello estableceu exencións en diversas taxas, como auga e lixos.

Segundo sinalou, en próximos días dará a coñecer a nova proposta do Concello: un sistema de cubrición en espazos públicos para que os hostaleiros poidan dar aos seus clientes “a mellor atención posible”, e que terá vocación “permanente”.

“Eu levo 14 anos atendendo á hostalaría desta cidade, e sígoo facendo. Non somos todos iguais”, proclamou Caballero, quen incidiu en que o seu goberno converteu á cidade “nunha das máis visitadas”, cos consecuentes beneficios para o sector.

Así mesmo, á marxe de taxas municipais e de promoción turística, tamén sinalou que os hostaleiros vigueses contan cun equipo de “asesores COVID” que visita os establecementos para informar e asesorar achega do cumprimento da normativa sanitaria, financiados polo Concello.