O Comité Executivo de Zona Franca de Vigo aprobou este martes o seu Plan Anual de Obxectivos para 2021, ano en que prevé realizar investimentos por case 60 millóns de euros; así como a adxudicación da xestión do centro comercial A Laxe; e a ampliación da bonificación na renda ao aparcadoiro no mesmo centro comercial.
Segundo informou o organismo, o ano que vén Zona Franca prevé investir uns 60 millóns de euros. Deles, 18 millóns destinaranse aos seus parques empresariais (Porto do Molle, Balaídos, Bouzas, PTL e A Pasaxe); 4,1 millóns serán para a rehabilitación do ámbito da Panificadora, ao carón do Concello de Vigo; 3,6 millóns investiranse en melloras de eficiencia enerxética nos polígonos empresariais; 2,8 millóns na nova sede do organismo en Areal; e 1,5 millóns serán para iniciar a obra do edificio do ‘World Car Center’.
Por outra banda, o Comité Executivo tamén aprobou a adxudicación, á empresa Optima Asset Management Ibérica, da xestión do Centro Comercial A Laxe. O contrato prevé unha vixencia de 20 anos, con posibilidade de prórrogas dun máximo de 10 anos.
Así mesmo, acordouse incrementar ata o 60 por cento a bonificación na renda do aparcadoiro deste centro comercial, debido á situación excepcional de caída de ingresos pola pandemia de COVID.
