Acciona vendeu a súa partipación maioritaria na concesionaria do hospital Álvaro Cunqueiro –a agrupación de empresas que forma Sociedade Concesionaria Novo Hospital de Vigo S.A.– ao fondo francés de infraestruturas Meridiam.

Esta operación enmárcase nun acordo alcanzado por Acciona para vender a Meridiam e Bestinver as súas participacións en oito activos concesionais en España, que inclúen dúas autovías, catro hospitais, unha canle de auga e unha universidade, por un importe de 484 millóns de euros.

Desta cantidade, 357 millóns de euros representan o valor das participacións da compañía e 127 millóns de euros, a débeda asociada, segundo informou este luns o grupo nun comunicado.

En concreto, Acciona desprenderase das súas participacións concesionais na Autovía A-66 Ruta da Prata (Xixón-Sevilla), a autovía CM-42 dos Viñedos (Toledo-Tomelloso), o hospital Álvaro Cunqueiro (Vigo), o Hospital de Toledo, o Hospital Can Misses (Eivissa), o Hospital Universitario Infanta Sofía (Alcobendas), a Canle de Navarra e a Facultade de Dereito da Universidade de Barcelona.

Meridiam adquirirá participacións de referencia nos oito activos, cun paquete valorado en 312 millóns de euros, mentres que Bestinver, a través do seu novo fondo de infraestruturas, tomará participacións minoritarias na autoestrada CM-42 e nos hospitais de Eivissa e Alcobendas, por 45 millóns de euros, nas mesmas condicións.

O grupo prevé pechar esta operación, suxeita a diversas autorizacións, no primeiro semestre de 2021. Antes de finalizar 2020, Acciona estima que ingresará, como pago parcial do prezo da transacción, 234 millóns de euros.

Acciona destacou que esta operación se enmarca na súa estratexia de rotar activos maduros co obxectivo de maximizar o retorno do capital empregado, continuar coa redución do endebedamento financeiro do grupo e impulsar novos investimentos, ademais de cumprir co obxectivo de venda de activos anunciado.

Crédit Agricole Corporate and Investment Bank actuou como asesor financeiro exclusivo de Acciona nesta operación.

CRÍTICAS DO BNG

O BNG reclamou á Xunta que rescate para o público a concesión do hospital Álvaro Cunqueiro de Vigo e que se faga coa participación maioritaria da que se desprende Acciona.

A deputada nacionalista Montse Prado recrimina ao Goberno galego que exerza como “comercial” das grandes empresas e o “capital especulativo”.

Respecto diso, avisa ao presidente da Xunta, Alberto Núñez Feijóo, que este é o momento para “devolver” o centro hospitalario vigués á sanidade pública galega.

“Insistimos en que actúen porque este é o momento de facerse con esas accións”, indica, para que se non cometa “o mesmo erro” que co hospital Povisa.

E é que Prado censura o modelo de concesión posto en marcha pola Xunta neste centro vigués, que implica un canon de 20 anos á UTE concesionaria liderada por Acciona para cobrar o investido na construción, ademais da xestión de servizos non sanitarios.

“Un hospital que inicialmente estaba previsto que custase 400 millóns, que ao final o Goberno do PP na Xunta adxudicouno por 1.300 millóns e cun canon que só nos orzamentos que se están presentando agora para 2021 supón 108 millóns directo para a concesionaria”, reproba.