A candidatura do vigués Pedro Pablo Rey Vera foi a primeira en formalizarse de maneira oficial para concorrer á Presidencia da Confederación de Empresarios de Galicia (CEG).
Segundo informa a patronal galega nun comunicado, este luns a CEG recibiu a candidatura oficial de Pedro Rei de face á asemblea electoral que se celebrará o 24 de novembro.
Rey Vera é vocal da Asemblea Xeral da CEG por CECAP-Galicia,presidente do Grupo CIP (Centro de Iniciativas Profesionais) e sociofundador da primeira universidade privada en liña de España (Udima).
Deste xeito, convértese no primeiro en oficializar a súa candidatura a falta de que outros como o ourensán José Manuel Díaz Barreiros decidan se dan o paso tras mostrar a súa intención de presentarse a estas eleccións.
A patronal galega leva case tres anos en situación de interinidade ao chegar ata en dúas ocasións á cita electoral sen que ninguén dese o paso de presentarse como candidato. Neste período foi o máximo responsable da confederación coruñesa, Antonio Fontenla, quen, por razóns de idade, exerceu como portavoz.
