O Ministerio de Transportes, Mobilidade e Axenda Urbana (Mitma) licitou un contrato de servizos para a execución de diversas operacións de conservación e explotación en estradas do Estado nun sector da provincia de Pontevedra por un importe de 17 millóns de euros.

En concreto, o sector de estradas afectado é o nº3, que inclúe a A-52 entre os quilómetros 267,1 e 306,1; a A-55 ata o quilómetro 32; a VG-20 (segundo cinto de Vigo); a N-120 entre os quilómetros 609,9 e 653,4; a N-550 entre o quilómetro 142,2 e o 155,8; o acceso a Tui pola N-551; a N-552 entre Redondela e Vigo; a N-555 ao aeroporto de Peinador; e a ligazón de Covelo entre a A-52 e a N-120.

Este contrato plurianual enmárcase dentro do programa de mantemento das infraestruturas de transporte en Galicia, no que o Mitma investiu o pasado ano 2019 máis de 58 millóns de euros en conservación e explotación das estradas do Estado.