O grupo biofarmacéutico Zendal, a través da súa filial Biofabri, foi o elixido pola compañía americana Novavax para a produción industrial da súa vacina contra a Covid-19 na Unión Europea.

Así o recolle o acordo asinado entre as dúas empresas, Biofabri, integrada no grupo Zendal, e a estadounidense Novavax, contrato polo cal a compañía con sede no Porriño será a encargada para a Unión Europea da produción da vacina deseñada pola farmacéutica con sede en Meryland, cuxos ensaios clínicos se atopan actualmente na fase 2 e que se estima que inicien a fase 3 a finais do terceiro trimestre de 2020.

“Este acordo é a ratificación do noso esforzo permanente pola innovación e a nosa aposta pola excelencia en biotecnoloxía. Tamén desde Zendal queremos destacar o apoio mostrado polo Ministerio de Sanidade e a Axencia Española do Medicamento durante todo este proceso”, dixo o CEO do Grupo Zendal, Andrés Fernández.

Zendal é un grupo biofarmaceútico formado actualmente por 6 empresas, todas enmarcadas no sector da biotecnoloxía e vacinas para saúde humana e animal: CZ Vaccines, Biofabri, Vetia, Petia Animal Health, Zinereo Pharma e Probisearch. Actualmente, teñen varias liñas de traballo relacionadas co SARS-COV-2, desenvolvidas a través de dúas das súas filiais con desenvolvementos e produción no campo das vacinas de humana: CZ Vaccines e Biofabri.

Biofabri está especializada no desenvolvemento de novas vacinas para humanos, entre outras, MTBVAC, a novel vacina contra a tuberculose, actualmente en fase 2 de ensaios clínicos, empezará a fase 3 a principios do 2021.