A sala do Contencioso Administrativo do Tribunal Supremo ditou unha sentenza na que estima de forma parcial un recurso, e anula o acordo do Consello da Xunta do 30 de xullo de 2009, polo que se aprobou o proxecto sectorial do Parque de Tecnoloxía Alimentaria de Mougás, en Oia, e que permitía a ampliación da planta de cría de rodaballo da empresa Insuíña, filial de Nova Pescanova.
Segundo a resolución do TS ese proxecto non é axustado a dereito, ao non incluír o estudo de alternativas posibles para a avaliación de impacto ambiental. Así, estima parcialmente un recurso de casación interposto polo Cámping Mougás, contra unha sentenza do Tribunal Superior de Xustiza de Galicia (TSXG) que avalaba o acordo do Consello da Xunta, e que queda agora anulada.
DENUNCIA
O Cámping Mougás interpuxo un recurso contra o acordo do Consello da Xunta esgrimindo varios argumentos relativos a cuestións ambientais, de viabilidade económica ou do uso de enerxías renovables na planta de Insuíña.
O TSXG desestimou o recurso e ratificou o acordo, e os demandantes presentaron recurso de casación ante o Tribunal Supremo. Agora, o alto tribunal estimou parcialmente devandito recurso e anula a sentenza do órgano xudicial galego, así como o acordo da Xunta.
