A dirección da factoría do Grupo PSA en Vigo acordou este sábado cos sindicatos SIT (coñecido como o sindicato amarelo) e UGT un Expediente de Regulación Temporal de Emprego (ERTE) por causas organizativas e de produción para renovar gradualmente a actividade produtiva e que só afectará o persoal laboral fixo. Razón pola que non o subscribiron CCOO, CIG nin CUT, tamén con representación no comité de empresa da planta de Balaídos.

O novo ERTE, segundo informou PSA, entrará en vigor cando conclúa o actualmente en vigor por causa de forza maior e prolongarase ata final de ano.

O expediente, que engloba tamén o persoal indefinido con contratos a tempo parcial, contempla un máximo de 90 días laborables como xornadas de suspensión e desenvolverase en dúas fases. Unha primeira para a continuación de actividade, con integración progresiva dos equipos e compatible coa aplicación das medidas de prevención reforzadas contra a Covid-19 e de illamento de persoas; e unha segunda para usar nos días non laborables por causa da redución das vendas de vehículos ata final de ano.

O nivel de cobertura será do 80 % do salario dos días de suspensión máis a parte proporcional de pagas extras, e do 100 % do salario en vacacións.

O ERTE establece para o persoal eventual unha remuneración mínima de 80 horas ao mes e o compromiso de que teñan prioridade para volver ser contratados cando haxa actividade se se extingue o que teñen en vigor antes de 12 meses.

CCOO e CUT decidiron non subscribir o ERTE porque entenden que tería que ser tramitado á luz dos criterios do Goberno, que buscan protexer a todos os traballadores, tamén aos temporais e en condicións máis precarias.

O aprobado por PSA Vigo distingue entre persoal eventual e fixo e non foi negociado desde a excepcionalidade que supón unha situación como a pandemia da Covid-19, esgrimen os sindicatos discrepantes.

“Os elos máis débiles do noso persoal, eventuais e tempos parciais, volven ser os máis precarizados nunha situación tan extraordinaria como esta”, sinala CCOO, que explica que non subscribe o ERTE “por coherencia e responsabilidade”.

Tampouco o subscribe a CIG, que denominou ao ERTE como “atraco selectivo”, e que critica a unha dirección “incapaz de antepoñer o seu persoal aos retos que supón a loita contra a ameaza da Covid-19” e que peca de “avaricia”.