O alcalde de Vigo, Abel Caballero, celebrou este xoves que hai “ánimo” e “vontade” de reactivar a economía da cidade por parte dos diferentes axentes económicos e sociais, así como “vocación de saír xuntos” da crise provocada pola pandemia de coronavirus.
Así o trasladou despois de presidir unha reunión do consello asesor cidadán constituído para relanzar a actividade económica e empresarial en Vigo, e no que participaron representantes de diferentes industrias, do sector pesqueiro, da hostalaría, comercio, medios de comunicación e de organismos como Deputación de Pontevedra, Zona Franca, Porto e aeroporto.
O rexedor olívico constatou, tras o encontro, que os diferentes sectores teñen o “ánimo” de renovar a actividade e a “vocación de saír xuntos” da crise causada pola pandemia. Así, proclamou que viu unha cidade “que non se deixa atemorizar polas circunstancias”.
Con todo, sinalou que os diferentes axentes económicos trasladaron as súas demandas e as súas necesidades, entre elas, medidas de liquidez ou apoio das diferentes administracións en aspectos como redución de impostos e taxas, ou flexibilización de prazos de pago.
Abel Caballero afirmou que o Concello pretende ser “transmisor” desas demandas, e reclamou “acordos” con administracións como a Deputación, a Xunta, o Goberno de España ou mesmo no ámbito da UE, porque “desta crise sáese cunha reactivación económica poderosa, e non elixindo os recortes, que levan á miseria e a inacción”.
A partir de agora, avanzou o alcalde, volverán repetirse as reunións, esta vez por sectores, para concretar esas necesidades. Ademais, engadiu, tamén haberá contactos con representantes da cultura, as asociacións cívicas, ONG, etc.
