Abanca adquiriu as accións que ata agora tiñan Sabadell e Caixabanc en Nova Pescanova, polo que a entidade financeira que dirixe Juan Carlos Escotet controlará o 80 por cento da compañía pesqueira.
Abanca informa de que a operación se formalizará nas próximas semanas. Nese momento, pasará a controlar maioritariamente a multinacional con sede no concello pontevedrés de Redondela.
Deste xeito, a entidade financeira duplica o seu peso na pesqueira ao pasar do 40 ao 80 por cento das accións. A compra prodúcese sobre a parte que pertencía ao Banco Sabadell e Caixabanc.
Segundo explica Abanca, o obxectivo da operación é “salvagardar unha empresa fundamental para Galicia e devolver “os órganos de dirección” á comunidade.
Así, a entidade que encabeza Escotet culmina o proceso de control sobre a multinacional pesqueira, xa que pasou de contar co 5% das accións de Nova Pescanova a, posteriormente, o 40%, cifra que agora se duplica, o que lle outorgará o control sobre a compañía.
Abanca explica que o seu “plan” inclúe “reforzar a estrutura finaciera da compañía” e “os seus principais ámbitos de actividade corporativa e comercial”.
“De acordo co seu plan, Abanca reterá unha participación importante no accionarado de Nova Pescanova para avanzar na procura dun socio industrial que permita contruir un proxecto de valor a longo prazo desde Galicia”, engade a entidade finaciera.
