O delegado de Zona Franca de Vigo, David Regades, e o embaixador de Cuba en España, Gustavo Machín, acordaron estreitar lazos de cooperación e colaborar en programas de intercambio comercial entre Galicia e Cuba, a través dos proxectos de internacionalización e parques empresariais do organismo estatal. Así o trasladaron tras manter un encontro, previo á celebración, en Baiona, do I Foro Iberoamericano Cuba-España.
Tras esa reunión, Regades e Machín explicaron que se constituirá unha mesa de traballo para sustanciar esa cooperación e, no prazo dun ano, revisaranse os resultados obtidos.
Ademais, explicaron que Cuba está interesada en atraer empresas galegas de alimentación, e ampliar negocios en sectores de enerxías alternativas, materiais de construción e actividades complementarias ao turismo, para o que brinda unhas condicións fiscais e económicas moi favorables na súa zona empresarial de desenvolvemento do Mariel.
Regades, pola súa banda, destacou que, actualmente, xa existen dúas empresas instaladas en Zona Franca que comercian con éxito na illa caribeña diques de amarre deportivos e sistemas de climatización e anunciou que o próximo día 29 de abril Zona Franca celebrará unha xornada específica sobre oportunidades de negocio no mercado cubano
Segundo lembrou, as exportacións galegas a Cuba case se duplicaron en poucos anos, pasando de preto de 16 millóns de euros a máis de 30 millóns. Segundo a base de datos do Ministerio de Industria, a comunidade galega conta con 128 empresas que venden os seus produtos regularmente a Cuba.
