O Grupo PSA recortou un 14,3% as súas matriculacións mundiais durante o pasado mes de xaneiro, cun volume de 206.861 unidades en comparación coas 241.454 unidades entregadas no devandito mes do ano anterior, segundo datos publicados pola empresa.

Por rexións, o grupo que dirixe Carlos Tavares comercializou 182.549 unidades en Europa o mes pasado, un 14,2% menos, mentres que en Oriente Medio e África vendeu 9.073 unidades, un 101,6% máis, e 8.964 unidades en Latinoamérica, un 3% menos.

En China e Sueste asiático, a compañía automobilística rexistrou un volume de vendas de 4.081 unidades, un 68,5% menos, á vez que matriculou 1.305 unidades en India e Pacífico, un 13,7% menos, e 889 unidades en Eurasia, un 104,4% máis.

Por marcas, Peugeot pechou o primeiro mes do ano con 82.113 unidades vendidas, un 9,5% menos, mentres que Citroën vendeu 56.711 unidades, o que representa unha diminución do 13% respecto ao mesmo período de 2019.

As entregas mundiais de DS experimentaron un crecemento mensual do 48,9%, ata 4.364 unidades, e Opel/Vauxhall contabilizou unhas entregas de 63.673 unidades o mes pasado, cunha redución do 22,9%.

A CUT ESTUDA IMPUGNAR O CONVENIO

O sindicato CUT anunciou este martes que estuda impugnar o proceso de negociación do convenio colectivo da planta de PSA Peugeot Citroën en Vigo (acordo que foi asinado, hai uns días, unicamente polo sindicato SIT, o maioritario no comité), tras constatar que se están producindo “modificacións constantes” e se recollen cambios “que non foron negociados”.

Segundo este sindicato, que ten 4 dos 33 delegados no órgano de representación dos traballadores, tras recibir o borrador do texto do convenio e os anexos, “as sorpresas son innumerables”, e puxo como exemplo a posibilidade de que a quenda de noite do sistema 1 traballe 7 de 7 xornadas.

Así mesmo, a CUT lembrou que o proceso de negociación deste convenio “xa empezou con polémica” pola negativa da empresa a que os sindicatos puidesen contar con asesores externos na mesa. Esa decisión foi denunciada por esta central, que advertiu de que, se os tribunais estiman a súa demanda, “pode retrotraerse o proceso de negociación ao seu comezo”.