Case a metade das empresas galegas prevén incrementar o seu persoal nos próximos meses, mentres que só un 2,7% cre que vai reducilo, porcentaxe que neste último caso ascende até o 6% na media nacional. Desta forma, Galicia sitúase por enriba da media en previsión de aumento de persoal, e segunda en mantemento de emprego.

En canto ao nivel de formación que precisan as empresas, mentres que o resto de comunidades autónomas españolas necesitan titulados en formación profesional, Galicia reclama menos FP que a media e pide máis universitarios.

“Algo se está facendo diferente cando os datos son o oposto ao resto”, apuntou o director da Fundación AXA, Josep Alfonso, que subliñou que, “en xeral, as empresas galegas móstranse moderadamente optimistas ante o seu futuro”.

Estes datos despréndense dunha sondaxe realizada polo foro de investigación xornalística e sociolóxica Educa 2020, en colaboración coa Fundación AXA e a empresa demoscópica GAD3 sobre un total de 2.500 empresas en toda España, das que 160 son galegas.

Na presentación estaba prevista a participación do xornalista e presidente de Educa 2020, Fernando Jáuregui, que finalmente non estivo presente porque non puido aterrar no Aeroporto de Peinador, polas incidencias meteorolóxicas que afectaron a varios voos na mañá deste martes.

Así as cousas, Josep Alfonso trasladou que no relativo ás titulacións máis demandadas, coinciden as empresas no conxunto estatal e as galegas, aínda que destacou que Galicia non inclúe entre as súas principais demandas as titulacións de FP relacionadas con hostalaría e turismo, e é a única na que se inclúe dereito entre as carreiras universitarias máis demandadas.

En canto á contratación por xénero, indicou que no último ano contratouse a máis mulleres que homes, cunha porcentaxe similar ao nacional, aínda que cambiou a representación, con Galicia 10 puntos por encima na contratación feminina que a media española. Así, Galicia é a segunda comunidade, despois de Asturias, con maior contratación de mulleres.

DIFICULTADES DE CONTRATACIÓN

Pese ao elevado índice de paro que hai en España, as empresas sondadas trasladaron que atopan dificultades na contratación de persoal. Así, o 63% das empresas en España atopa dificultades á hora de cubrir a demanda de emprego, porcentaxe que chega ao 65% en Galicia.

Tal e como arroxa este informe, as empresas teñen dificultades á hora de atopar técnicos especializados. Así, atópanse principalmente con falta de candidatos, falta de traballadores con experiencia e falta de competencias técnicas dos aspirantes.

Neste marco, só o 42% de empresas galegas e o 48% do total estatal considera que as universidades ofrecen formación suficiente aos estudantes en relación coa necesidade das empresas, e, como consecuencia, o conxunto destas recoñece que vénse obrigadas “a investir tempo e recursos na formación dos seus traballadores”.

A secretaria xeral de Emprego, Covadonga Toca, asociou esta situación ao amplo mapa de titulacións, nos que a formación “é boa, pero ás veces as titulacións non se axustan ás demandas empresariais”. É por iso que se está traballando para cambiar o mapa de titulacións e incidiu na importancia de ofrecer “unha formación paralela que complemente”.

En canto ás profesións que estas empresas consideran que van desaparecer a curto prazo nos seus respectivos sectores, as máis mencionadas foron as de administración; e as que ven con máis futuro son as vinculadas con innovación, tecnoloxía e data.

AS EMPRESAS GALEGAS “ESTÁN A CRECER MOITO”

A presidenta do Círculo de Empresarios de Galicia, Patricia García, dixo que, baixo o seu punto de vista, “Galicia está a crecer, e moitísimo, a nivel empresarial”. Así, entende que o feito de que “as empresas crecen” explicaría por que demandan titulados universitarios. “Quizá necesiten crecer en postos de dirección”, apostilou.

Así mesmo, considerou “moi positiva” a cifra achegada sobre a contratación de mulleres por parte das empresas, aínda que recalcou que habería que saber “como se traduce en bandas salariais e que postos están a ocupar” as mulleres no mundo laboral.

Finalmente, Toca remarcou que as empresas necesitan máis empregados por que coa recuperación económica necesitan perfís técnicos. Neste marco, destacou que a Xunta traballa en promover a FP dual, na que “hai que seguir profundando”, e tamén na formación para o emprego, a través dos certificados de profesionalidade.

Neste obxectivo de tentar dar resposta ás empresas, tamén manifestou que se puxeron en marcha axudas para empresas que queren formar a novos traballadores, de forma que lle axudan a deseñar esa formación a medida a cambio de contratación; e para que poidan ofrecer formación á carta aos seus traballadores.