O presidente da Autoridade Portuaria de Vigo, Enrique López Veiga, rexeitou este venres as acusacións de quen o sinalan como responsable de pór dificultades ou tratar de frear o proxecto de construción e reparación naval que o grupo Vicalsa ten para as instalacións do estaleiro Vulcano (en proceso de liquidación).
Na rolda de prensa posterior á reunión do Consello de Administración do Porto, e a preguntas dos xornalistas, López Veiga insistiu en que non está “en contra de nada”, e limitouse a lembrar que a posición deste organismo, que recorreu o proceso de liquidación de Vulcano e solicitou informe ao Consello de Estado sobre a concesión, está avalada pola Avogacía do Estado.
A ese respecto, e tras reiterar que a petición do informe ao Consello de Estado cursouse polas canles legais, e “non pola vía máis longa”, informou de que o propio grupo Vicalsa comunicou ao Porto a súa intención de “esperar” por ese informe.
Se dito informe avala as teses do Porto, que sostén que a concesión non pode ser obxecto de liquidación porque quedou extinguida ao disolverse Vulcano, o grupo Vicalsa fará unha solicitude de concesión “de acordo co artigo 84” da Lei de Portos. “Ao final Vicalsa di que o Porto tiña razón, que é mellor esperar ao informe do Consello de Estado e logo remitirán a solicitude”, engadiu, e lembrou que esa concesión será sometida a un proceso de concorrencia, por se algunha outra empresa está interesada.
Sobre as críticas de Asime, que denunciou a “política activa” do Porto para pór “todas as dificultades do mundo” ao proxecto de Vicalsa, Enrique López Veiga aseverou que “o que digan certos personaxes” dálle “igual”. Na mesma liña, respondeu cun “fan ben” a quen, como Marea, BNG ou a CIG, pediron a súa dimisión, e lembroulles que “o Porto ten que aplicar a lei”.
