O despacho vigués Balms Abogados pediu o embargo da sociedade Iveco España como medida para forzar o pago dos case 40.000 euros que debe pagar a unha empresa de Meis, tras a sentenza do xulgado do mercantil número un de Pontevedra que condenou a compañía polos sobrecustos polo cártel de camións.
Unha vez concluído o prazo de pago voluntario do montante decretado na sentenza, Balms Abogados pediu ao xulgado esta medida ao considerar que Iveco España se atopa “en rebeldía procesual”, é dicir, non aceptou, nin respondeu a ningún dos requirimentos que, durante o proceso, se lle remitiron desde o xulgado.
O Xulgado do Mercantil número 1 de Pontevedra ditou o pasado mes de setembro sentencia condenatoria contra o fabricante de camións Iveco Spa en favor de Kartin SL, no que sería a primeira sentenza en firme en España contra o coñecido como cártel dos camións ao non recorrer a empresa en prazo.
Segundo cuantifica a propia sentenza, Iveco Spa debe abonar a Kartín SL unha indemnización por danos que ascende a preto de 20.000 euros, e outros 19.240 euros correspondentes aos intereses legais desde a data de compra do vehículo.
O mesmo xulgado tamén ditou sentenza condenatoria contra MAN Truck & Bus AG, aínda que neste caso foi recorrida, polo que aínda non pode considerarse como firme.
