A portavoz nacional do BNG, Ana Pontón, instou á Xunta a crear unha mesa para a transición enerxética en Galicia que permita activar un “plan de futuro” para a central das Pontes e reclamou a intervención pública do estaleiro de Barreras en Vigo.

Pontón lanzou estas dúas propostas durante unha visita este xoves á feira Conxemar de Vigo, na que asegurou que a “preocupación” sobre o futuro da térmica das Pontes sobe “unha escala máis” tras a reunión mantida o mércores polas partes no Ministerio para a Transición Ecolóxica.

E é que, segundo apuntou, desa reunión conclúese que “o ministerio non ten un plan de futuro para As Pontes” pero “a Xunta tampouco”. “Nunha cuestión tan importante para o futuro de Galicia porque está en xogo un sector estratéxico como é o enerxético, a Xunta non pode ser observadora, este é un tema de país e desde esa perspectiva temos que abordalo”, subliñou.

Por iso, a portavoz nacional do Bloque esixiu a constitución dunha mesa para abordar unha transición enerxética en Galicia para pór en marcha un “plan de futuro para As Pontes” e na que estean presentes as organizacións políticas, a Xunta, o ministerio e a empresa.

“É evidente que hai que abordar o futuro da descarbonización pero iso non pode ser a escusa para que unha empresa que estivo a explotar os nosos recursos naturais pense que pode seguir desmantelando a produción que hai e deixar a comarca tirada”, asegurou.

“Necesítase un plan de futuro e nós o que reivindicamos é que Galicia ten que deseñar, desde unha perspectiva de país, ese plan de futuro”, subliñou.

Na súa intervención, a xefa de filas dos nacionalistas galegos tamén se referiu á situación do estaleiro de Barreras, unha infraestrutura que, na súa opinión, “non ten que acabar en mans dun fondo especulativo”.

“A Xunta debe facerse cargo da maioría do estaleiro”, manifestou Pontón, que pediu unha “intervención pública” que “garanta o futuro da produción de Barreras” e que “reoriente” a situación. “Porque é evidente que houbo mala praxe na propia empresa pero tamén hai que actuar desde a administración”, subliñou.

Na súa intervención, ademais, considerou que a situación do estaleiro é unha “responsabilidade directa” do presidente da Xunta, Alberto Núñez Feijóo, e do “fracaso” que representou a “operación Pemex”.

“Despois das promesas de 2013 o que nos queda é que se vendeu un estaleiro a prezo de saldo, que se descapitalizou nunha parte pola tecnoloxía pero tamén polos propios traballadores, e que agora mesmo están nunha situación límite”, considerou.