O BNG rexistrou no Concello de Vigo, para que sexa aprobada no próximo pleno ordinario, unha proposta para unha declaración institucional de apoio ao mantemento do emprego e da actividade industrial no estaleiro Vulcano, en situación de liquidación.

Segundo trasladou o concelleiro nacionalista Xabier Pérez Igrexas, esta iniciativa pretende que toda a corporación olívica, de forma unánime, exprese o seu apoio aos traballadores deste “estaleiro emblemático”, así como aos da industria auxiliar que dependen da actividade nesta bancada.

Así mesmo, sinalou o edil, a declaración inclúe demandar “a todas as administracións competentes” que “cumpran os compromisos contraídos co persoal” de Vulcano, que sente “abandonada”, e que se tomen medidas “urxentes” para asegurar a actividade e o emprego.

“Queremos promover unha posición firme, de cidade (…) Espero que a proposta conte con consenso e se poida aprobar de forma unánime. Os traballadores de Vulcano non se merecen menos”, afirmou Pérez Igrexas.