O Diario Oficial de Galicia (DOG) publica este venres o informe ambiental estratéxico do Plan Especial de Reforma Interior (PERI) do ámbito onde se sitúan as antigas instalacións do Grupo de Empresas Álvarez en Ramón Nieto, na parroquia viguesa de Cabral, un informe favorable, xa que “non se prevé” que a actuación proxectada teña efectos ambientais adversos significativos.

O documento emitido pola Dirección Xeral de Calidade Ambiental e Sostenibilidade da Consellería de Medio Ambiente e Cambio Climático sinala que o ámbito de actuación comprende algo máis de 106.000 metros cadrados e que nel atópanse algúns elementos catalogados pertencentes ao patrimonio industrial (antiga fábrica de Santa Clara). Así mesmo, algunhas zonas do perímetro oeste están dentro dunha zona inundable.

O PERI opta por unha ordenación na que se inclúen vivendas libres e protexidas (un máximo de 950 vivendas), zona terciaria e zona verde, e prevese a rehabilitación do edificio administrativo principal da antiga fábrica e da cheminea do forno. O informe é positivo aínda que matiza que deberán atenderse unha serie de condicións: a normativa deberá conter normas específicas que regulen as condicións nas que deberán executar os espazos libres, en particular, “en canto ao mantemento do arboledo autóctono de interese”.

Tamén advirte de que se deberá facer, antes da elaboración do PERI, unha prospección arqueolóxica do ámbito para concretar as estruturas que se deben conservar e integrar; igualmente, o plan debe incluír unha estimación do caudal preciso para atender ás necesidades da proposta e comprobar a suficiencia do saneamento e depuración. Outra das condicións é a adopción de medidas destinadas a minimizar as afeccións por ruído ambiental, e a incorporación dun estudo de avaliación da mobilidade.