O presidente de Navalia, José García Costas, aspira a converter a feira da industria do naval nun evento anual, xa que na actualidade celébrase cada dous anos: “Xa vai sendo hora de que poidamos mostrar ao mundo todo o que facemos cada ano”. Así o sinalou na presentación da Zona Innovación do evento, que celebrará a súa décima edición entre o 19 e o 21 de maio no Instituto Feiral de Vigo (Ifevi).
Para el, trátase de algo “moi necesario” que “ten metido entre cella e cella”. Na súa intervención no acto, engadiu que, “se non é a próxima edición, será a seguinte”, pero Navalia pasará a ser todos os anos. “Creo que é xa unha necesidade porque a innovación se desenvolve todos os días”, apuntou García Costas, quen puxo precisamente en valor esta Zona de Innovación, que repetirá por segunda vez na feira.
En concreto, este ano practicamente duplicará o seu espazo, pasando de 240 metros cadrados a case 400. Así, nela presentaranse até 24 ‘start ups’ chegadas de toda España e do estranxeiro. O delegado do Estado na Zona Franca de Vigo, David Regades, foi o encargado de abrir a presentación, celebrando esta nova edición da Zona de Innovación de Navalia e destacando que chegarán a ela até catro proxectos da Zona Franca de Cádiz. Pechou o acto o alcalde de Vigo e presidente da Zona Franca, Abel Caballero, quen subliñou o traballo que hai detrás dunha feira destas características e insistiu en que Zona Franca sempre estará para apoiar a Navalia.
