A empresa galega Alén Space, con sede en Nigrán, especializada no deseño, fabricación e operación de pequenos satélites, vén de finalizar a construción do satélite ETRISat, un CubeSat 6U desenvolvido integramente nas súas instalacións de Nigrán para o Electronics and Telecommunications Research Institute (ETRI), unha das principais institucións públicas de investigación tecnolóxica de Corea do Sur.

O satélite xa foi entregado a ETRI e atópase en Corea do Sur á espera do seu lanzamento a bordo dun foguete Nuri (KSLV-II) do Korea Aerospace Research Institute (KARI). O despegue está previsto nos próximos días desde o Centro Espacial Naro, situado na provincia de Jeolla do Sur.

Obxectivos da misión

O propósito principal de ETRISat é a demostración en órbita de tecnoloxías de comunicacións, en liña coas iniciativas de ETRI para a evolución das redes satelitais e marítimas. Un dos retos será verificar o envío de sinais desde boias oceánicas equipadas para recoller datos ambientais, como a temperatura da auga ou a altura das ondas, transmitindo esa información en tempo real a estacións terrestres.

O satélite integra como carga útil a radio definida por software TREVO, desenvolvida por Alén Space, sobre a que se executarán dúas aplicacións: unha de ETRI, centrada en validar solucións avanzadas de comunicacións, e outra de Alén Space, destinada á transmisión de sinais AIS (Automatic Identification System) para a xestión do tráfico marítimo.

Un proxecto chave en man

Alén Space levou a cabo ETRISat como unha misión completa, que abrangue desde o deseño e integración ata as probas, o software de control de misión e as operacións iniciais en órbita. A experiencia acumulada en misións anteriores permitiu acelerar os prazos de construción e adaptarse aos requisitos específicos de ETRI.

Colaboración internacional

Segundo destacou Guillermo Lamelas, CEO de Alén Space, esta colaboración reforza o posicionamento internacional da compañía como socio tecnolóxico fiable en proxectos innovadores e complexos. Corea do Sur, que en 2024 creou a súa propia Administración Aeroespacial (KASA), busca consolidarse como unha das principais potencias espaciais, e o lanzamento de ETRISat forma parte desa estratexia.

No voo compartido do foguete Nuri, ETRISat viaxará xunto con outros 12 satélites, marcando un novo fito para Alén Space e para a cooperación tecnolóxica entre Galicia e Corea do Sur.