O comité de empresa de Vitrasa, concesionaria do servizo de bus urbano de Vigo, anunciou a convocatoria de mobilizacións en protesta polas sancións que a compañía impón aos condutores por accidentes de tráfico durante a súa xornada laboral.

Segundo comunicou a CIG, que preside o comité, a empresa comunicou só no último mes dúas sancións a condutores, e o sindicato avanzou que os traballadores se concentrarán nas instalacións de Vitrasa os días 10 e 18 de setembro, de 7.00 a 10.00 horas. O comité xa denunciara anteriormente que “as condicións de traballo impostas pola compañía e o intenso tráfico que rexistra a cidade provocan unha presión excesiva no día a día da persoa de condución”.

Esta situación, explicaron os representantes dos traballadores, “pode traducirse en erros e accidentes”. “Se para nós supón unha carga emocional importante ter accidentes, que estes sexan sancionados engade máis presión ao noso traballo”, denunciaron. En todo caso, o comité matizou que ningún dos accidentes foi como consecuencia de saltarse as normas ou incumprir o código de circulación, senón que se deberon “ás condicións impostas pola empresa e o caos circulatorio na cidade”.

Respecto diso, tamén lembrou que os próximos meses serán “moi complicados”, polas obras que se están acometendo en rúas como Lepanto, Avenida de Madrid e Gran Vía, ao que se suma o inicio do curso escolar. As luces de Nadal ou calquera outro evento, engadiron desde o comité, aumentarán aínda máis este tipo de incidentes.

Segundo lembraron, os tempos de percorrido impostos seguen sendo insuficientes, e non se amplían nin sequera nestes contextos, os que “aumenta aínda máis a presión” sobre os condutores.