Arrinca este xoves en Vigo a 25ª edición da feira MotorOcasión, o salón do vehículo usado e de ocasión que segue ao Salón do Automóbil da cidade olívica, celebrado o fin de semana pasado. O evento, que levará a cabo no Instituto Ferialde Vigo (Ifevi), reunirá o stock dos concesionarios oficiais da comarca, ofrecendo unha “ampla” selección de vehículos de quilómetro cero, executivos, de demostración e ocasión, segundo indica a organización nun comunicado.

A exposición contará cunhas 1.000 unidades, xa que cada vez que se venda un coche será substituído inmediatamente por outro dispoñible. Os visitantes poderán comparar nun mesmo espazo marcas, modelos e prezos, coa garantía de unidades en perfecto estado e listas para a súa entrega inmediata.

“Todo iso por un prezo de entrada de só 4 euros e con condicións especiais ofrecidas polos concesionarios. Desde deportivos, SUV e familiares ata urbanos, coupés e a crecente oferta de eléctricos e híbridos, MotorOcasión Vigo é a oportunidade ideal para quen buscan un coche sen estrear, pero con vantaxes económicas”, engadiron. A feira abrirá este xoves a partir das 16.00 horas e ata as 21.00 horas, do mesmo xeito que o venres. O fin de semana o horario será de 11.00 a 20.00 horas.