A Xunta adxudicou por 7.814.439,06 euros as obras de construción de 38 novas vivendas de promoción pública en San Paio de Navia, en Vigo. O contrato, adxudicado á empresa Citanias Obras Servizos S.L.Ou, ten un prazo de execución de 18 meses e acaba de ser formalizado pola Consellería de Vivenda e Planificación de Infraestruturas, a través do Instituto Galego de Vivenda e Solo (IGVS).

Segundo detallou o Goberno galego nunha nota de prensa, o obxectivo é contruir un edificio de nova planta para destinalas a 38 vivendas protexidas, con prazas de garaxe e trasteiros. Trátase dunha nova promoción pública na cidade localizada na parcela M-IVE-10 dentro de San Paio de Navia, en Vigo, unha parcela cuxa superficie aproximada é de 1.297 metros cadrados.

En concreto, 20 das vivendas serán de tres dormitorios e 18 de dous dormitorios, a superficie destas oscila entre os 72 e 79 metros cadrados no caso destas últimas e de 90 metros cadrados no caso das primeiras. Así mesmo, haberá tamén dúas vivendas adaptadas a persoas con mobilidade reducida, que estarán no ático e disporán de tres dormitorios e unha superficie útil de 101 metros cadrados.

Con todo, a Xunta indicou que financia as obras maioritariamente con fondos propios, correspondendo o resto aos fondos da UE, e que o importe total do investimento supera os 9,5 millóns deles, dos que o Goberno galego financia con fondos propios máis do 80,4%, sinalou.