A dirección da planta viguesa do grupo automobilístico Stellantis reunirase o vindeiro venres, día 7 de xaneiro, co comité de empresa tras un encontro levado a cabo este mércores no que os distintos representantes sindicais plasmaron as súas propostas para os expedientes de regulación de emprego (ERTE e ERE) expostos. Así, será o venres cando Stellantis dará contestación ás distintas achegas sindicais, despois de que a semana pasada se anunciase a súa intención de levar a cabo un ERE voluntario que afectará a un máximo de 90 traballadores por causas organizativas.

Ademais, tamén realizará un ERTE dun máximo de 85 días para cada empregado, “que se utilizarían como un mecanismo complementario unha vez consumida a adecuación de xornada e o saldo negativo da bolsa de horas”. Precisamente, na reunión desta mañá, Comisiones Obreras pediu que a afectación do ERTE baixe a 50 días e que se manteñan ao 100 % todos os conceptos salariais, así como as pagas extra e as vacacións, entre outras medidas.

Así mesmo, respecto ao ERE, o sindicado pediu un equilibrio da repartición de prazas entre o persoal mensual e horario e xubilacións parciais. UGT tamén considera “excesivos” os 85 días de ERTE, pedindo tamén que se establezan rotacións nas zonas que sexan posibles para que as paradas non afecten máis a uns empregados que a outros. Sobre o ERE, UGT dixo que debe de ir na mesma liña que o do ano pasado, con medidas de acompañamento onde tanto o persoal mensual como aqueles de horario de taller poidan abandonar a empresa “nas mellores condicións posibles”.