Os sindicatos do comité de empresa da factoría de Stellantis en Vigo trasladaron este xoves a súa satisfacción pola noticia da adxudicación da nova plataforma industrial multienerxía, STLA Small, e valoraron que esta decisión permite manter a “estabilidade” da planta. Os representantes do persoal mantiveron un encontro co xefe de Stellantis para a rexión Europa Ampliada e número dous do grupo, Jean-Philippe Imparato, que lles trasladou o seu recoñecemento pola competitividade da fábrica viguesa.

O sindicato maioritario, SIT-FSI, lembrou que a nova plataforma, destinada a montaxe de vehículos pequenos (do segmento B,) “dará os seus primeiros froitos a partir de mediados de 2027”. Ademais, permitirá manter unha planta “bifluxo” en Balaídos, xa que suporá traballo para a liña M1, que actualmente ensambla os Peugeot 2008, “con todo o que leva en parámetros de investimentos, creación de emprego, desenvolvemento e viabilidade a anos vista”.

A noticia foi trasladada persoalmente este xoves por Jean-Philippe Imparato aos representantes dos traballadores, nun encontro a media mañá, celebrado no marco dunha visita á factoría.

Nese encontro, segundo explicou o SIT e a preguntas sobre os plans futuros para as próximas xeracións de furgonetas, Imparato sinalou que Vigo segue sendo o principal referente neste nicho de fabricación, e que a planta está nunha “situación vantaxosa” para cando chegue o momento de renovar os modelos.

Para o SIT-FSI, a adxudicación da nova plataforma é un recoñecemento ao compromiso do persoal, ao diálogo e a paz social na fábrica viguesa, tal e como indicou o presidente do comité, Daniel Álvarez.

“BOA POSICIÓN” PARA FUTURAS FURGONETAS

Desde CC.OO., Daniel Abella tamén incidiu en que Jean-Philippe Imparato puxo en valor de forma destacada o compromiso da parte social, que pon á factoría de Stellantis Vigo “nun nivel alto” de competitividade. “Valoramos moi positivamente a adxudicación da nova plataforma, que permitirá deixar a planta encamiñada cara á produción bifluxo”, destacou.

Igualmente, tamén puxo en valor as palabras do xefe de Stellantis para Europa sobre a “boa posición” que Vigo ten de face á adxudicación de novos modelos de furgonetas; e tamén destacou que Imparato “quere seguir contando” cos provedores locais, aínda que advertiu de que “deben dar un paso adiante” e “demostrar que poden seguir a Stellantis e poden competir”.

Por outra banda, ademais do “compromiso” e “sacrificio” dos traballadores, o número dous do grupo tamén trasladou ao comité que outro dos factores que levaron a esta adxudicación foron os apoios económicos por partes das distintas administracións.

O representante de UGT, Aser Sanz, insistiu na idea de que a nova plataforma é un recoñecemento aos traballadores dunha planta que, ao longo dos anos, “soubo responder as demandas e esixencias” do grupo, que fan que a fábrica sexa “competitiva”.

“Era un segredo a voces que faltaba por confirmar, e había certa inquietude, por fin confirmouse”, explicou, e valorou que “dados os tempos que veñen, que se siga apostando en España por seguir fabricando vehículos é unha satisfacción”.

COMPROMISO PARA A INDUSTRIA AUXILIAR

Pola súa banda, o sindicato CUT foi máis crítico, e constatou que, á marxe da “satisfacción” que poida haber na planta pola adxudicación da nova plataforma, “o discurso é recorrente: hai que aumentar competitividade e reducir custos por vehículo fabricado”.

Segundo sinalou Vitor Mariño, esa mensaxe repítese sen cambios, xa sexan tempos de bonanza económica para o grupo ou de “menos bonanza”, porque “a ameaza de China sempre está aí”.

Con todo, o portavoz deste sindicato fixo fincapé na necesidade de non perder de vista a situación da industria auxiliar local, para a que a mensaxe de Imparato “é o mesmo: teñen que ser eficientes e competitivos se queren fabricar para Stellantis”.

Nese sentido, Mariño lamentou que, “despois de tantas axudas públicas”, non haxa “un compromiso real de carga de traballo” para a rede de colaboradores locais do grupo, e remarcou que as axudas das administracións deben esar condicionadas a ese compromiso de traballo para a industria auxiliar local.

ABEL CABALLERO: TODO GRAZAS AO GOBERNO DE ESPAÑA

O alcalde de Vigo, Abel Caballero, celebrou este xoves cono “unha gran noticia para Vigo e unha gran noticia para Stellantis” a adxudicación da nova plataforma industrial multienergía á factoría de Balaídos, e remarcou que a planta ten o futuro “asegurado” para os próximos 35 anos grazas ao Goberno de España, ao Concello olívico e á Zona Franca.

“O que anunciaramos que ía pasar, finalmente pasou”, proclamou, en declaracións remitidas aos medios, antes de pór en valor o traballo feito desde o Consistorio “dándolle un tratamento especial a Stellantis”, o de Zona Franca, “que fixo tanto esforzo para que Stellantis puidese presentar ben o seu proxecto“, e o do Goberno de España, coas sucesivas convocatorias de PERTE para o vehículo eléctrico e conectado.

“A miña felicitación aos traballadores porque o mérito fundamental é deles. Vigo hoxe sorrí porque temos a automoción garantida polo esforzo do Goberno, do Concello e de Zona Franca para os próximos 35 anos”, reiterou.