O Ministerio de Industria e Turismo publicou este venres a resolución provisional da liña B da segunda convocatoria do proxecto estratéxico para a recuperación e transformación económica do vehículo eléctrico e conectado (Perte VEC II), entre as cales figura Stellantis como segunda maior beneficiaria cun total de 29,2 millóns de euros para a súa planta de Vigo.

A empresa afirma que este investimento público irá destinado a proxectos relacionados co desenvolvemento de novos deseños e tecnoloxías innovadoras aplicables ao proceso de montaxe do vehículo eléctrico na súa planta en Vigo.

En concreto, Stellantis –con esta achega que confirmaba o mércores o propio ministro de Industria, Jordi Hereu, desde a cidade olívica– porá en marcha iniciativas para a mellora da eficiencia enerxía e a sustentabilidade ambiental durante os procesos produtivos da planta.

Ademais, implementará procesos tecnolóxicos novos na área de ferraxe e embutición –obtención de pezas ocas a partir de chapas metálicas– destinada á fabricación de modelos de vehículos eléctricos, explica o departamento de Hereu.