InicioEconomíaO Concello admite que Vitrasa tardou 19 días en recuperar as liñas...

O Concello admite que Vitrasa tardou 19 días en recuperar as liñas e frecuencias de bus tras a folga

O BNG critica que Abel Caballero dá "barra libre" a Vitrasa e que non lle impón as correspondentes "sancións".

PUBLICADO O

- Advertisement -

O goberno municipal de Vigo admitiu que o servizo de bus urbano da cidade, que presta a concesionaria Vitrasa, tardou 19 días en recuperar a normalidade despois da folga indefinida que se estendeu desde o 25 de novembro do ano pasado ata o 11 de marzo deste ano. Así o expón o concelleiro de Servizos, Francisco Pardo, nun escrito de resposta a unha pregunta do grupo municipal do BNG efetuada no pleno do 25 de marzo pasado. Na devandita pregunta, os nacionalistas instaban ao goberno local a aclarar se se imporía algún tipo de sanción ou se tomaría algunha medida fronte á concesionaria por manter recortes nos servizos e frecuencias do bus urbano, unha vez desconvocada a folga.

A propia empresa concesionaria comunicou no seu momento que a volta á normalidade tería que ser progresiva, ao atoparse con case 70 condutores de baixa e varias decenas máis de vacacións ao finalizar o paro. De feito Vitrasa advertiu de que lle estaba custando contratar choferes no mercado laboral. O edil socialista respondeu ao BNG limitándose a constatar que “o servizo anterior ao comezo da folga, a día 1 de abril de 2024 figuraba restablecido”, sen detallar se haberá sancións ou algunha outra decisión.

“COMPLICIDADE” E “BARRA LIBRE”

Por iso, o BNG deu por feito que non haberá esas sancións, e acusou ao alcalde e ao seu goberno de actuar con “complicidade” fronte á concesionaria, á que dá “barra libre”. Para o portavoz nacionalista, Xabier Pérez Igrexas, a postura do goberno local evidencia a “total falta de control” sobre as concesións e servizos privatizados polo Concello, que en total supoñen máis de 200 millóns de euros ao ano do orzamento municipal.

Pérez Igrexas censurou que o concelleiro de Servizos non faga referencia, na súa resposta, ao feito de que, durante eses 19 días posteriores ao fin da folga, Vitrasa reduciu os horarios do servizo “ata en 15 liñas” sen autorización do Concello. O grupo municipal do BNG pediu pór fin á “complicidade” do goberno local con Vitrasa e coas empresas privadas que, en moitos casos, limítanse a “facer caixa” cobrando por “prestar menos servizo do contratado”, e reclamou a Abel Caballero que exerza as súas competencias de fiscalización e contral das concesionarias para garantir a prestación efectiva dos servizos.

Finalmente, criticou a decisión “ilegal” do goberno municipal de “negarse a constituír” a Comisión Informativa de Vixilancia da Contratación, a pesar de “ser obrigatoria, como marca o Regulamento Orgánico do Pleno”. “Caballero ten que explicar aos vigueses e viguesas por que, ademais de que o seu goberno non fiscaliza ás concesionarias, tamén impide que podamos facelo os grupos da oposición”, afeou Pérez Igrexas, que se cuestionou “que é o que quere seguir ocultando” o rexedor.

ÚLTIMAS

Un atuneiro dunha empresa viguesa, implicado nun naufraxio cun desaparecido nas Galápagos

O atuneiro 'Ría de Aldán', comprado o ano pasado pola viguesa Wofco, viuse implicado nun accidente...

Restablecen a circulación na ponte de Rande logo dun accidente múltiple que provocou retencións

A circulación na ponte de Rande quedou restablecida despois de algo máis dunha hora...

O AVE Vigo – Porto tardará 50 minutos, pero non se sabe cando estará operativo

Portugal prevé que a conexión en tren de Vigo ao Porto sexa de 50 minutos...

A Xunta intervirá Ambulancias del Atlántico con tres técnicos de Tragsa e xestionará a entrega de nóminas

Os sindicatos CIG, CC.OO. e USO informaron, nun comunicado conxunto, do achegamento de posturas...