A fábrica viguesa do grupo automobilístico Stellantis parará parte da súa produción a partir deste venres, día 15 de marzo, debido á persistencia dos problemas de aprovisionamento que vén rexistrando nas últimas semanas. Tal como informou a compañía aos traballadores, o Sistema 1 da planta de Balaídos, onde se ensamblan os Peugeot 2008, manterase sen actividade a partir da quenda de noite deste venres, e durante o luns e o martes da semana que vén.

O mércores, día 20, esta liña de produción comezará a operar a partir das 22.00 horas, segundo a previsión actual de Stellantis. Desta maneira, unha vez máis Stellantis Vigo vese obrigada a parar por problemas loxísticos. A semana pasada, a compañía tamén detivo parte da súa produción por falta de pezas, do mesmo xeito que ocorreu en reiteradas ocasións durante os últimos anos, cando se viu afectada pola crise dos microchips.