A biotech galega BETA Implants inaugurou este venres a súa nova planta situada na localidade pontevedresa de Mos e anunciou que prevé investir máis de 2,3 millóns de euros na construción dunha nova factoría na Plataforma Loxística Industrial de Salvaterra-As Neves.
A compañía, dedicada ao deseño, fabricación e subministración de implantes para uso veterinario, estreou as súas novas instalacións no polígono de Veigadaña, contando co respaldo de XesGalicia e VigoActivo.
Cunha área de produción de 500 metros cadrados e unha zona administrativa e de formación doutros 500 metros, a nova planta permitirá a BETA Implants cuadriplicar a súa capacidade de produción. Ata agora a compañía ocupaba unha nave de 200 metros cadrados en Salvaterra do Miño, cunha produción de 600 implantes ao mes. Agora podería alcanzar os 2.500 implantes mensuais no prazo de tres anos
Así mesmo, a empresa prevé a construción, antes de 2030, dunha nova factoría na Plisan. “Temos aí un dereito de chan de case 6.000 metros cadrados, sobre o que proxectamos unha nova factoría”, indicou a fundadora e directora xeral da firma, Bibiana Rodiño.
O investimento, segundo recolle BETA Implants nun comunicado, superará os 2,3 millóns de euros, dos cales 360.000 euros dedicaranse á compra de dúas parcelas e preto de 2 millóns á construción da nave.
