O Ministerio de Transportes, Mobilidade e Axenda Urbana publicou este mércores no Boletín Oficial do Estado o anuncio de licitación da concesión do servizo público de transporte regular de viaxeiros por estrada entre Madrid, Salamanca e Vigo. Dita licitación, levada a cabo a través da Dirección Xeral de Transporte Terrestre, terá un valor estimado duns 54,1 millóns de euros, para un prazo de execución de nove anos.
As empresas interesadas poderán presentar as súas ofertas ata o próximo 8 de xaneiro de 2024, mentres que a apertura da oferta económica realizarase o 5 de febreiro do ano próximo. No prego da licitación recóllense varias rutas que inclúen Vigo como destino ou orixe. En concreto, unha delas fará parada previamente en Pontevedra, ademais de en outras localidades galegas como Ourense e O Carballiño, habendo catro traxectos semanais de ida e de volta desde a cidade olívica.
Outra ruta, coa mesma periodicidade, chegará a Vigo antes de pasar por Pontevedra. Mentres que o traxecto directo entre Madrid, Ourense, Vigo e Pontevedra terá unha viaxe ao día de ida e volta. Entre outras condicións, o Ministerio establece que a compañía adxudicataria terá que ter polo menos 32 condutores en nómina, para dar servizo ás liñas regulares.
