O comité de empresa de Talleres Ganomagoga presentou unha denuncia ante a Inspección de Traballo polo “peche patronal” da empresa, inmersa en pleno proceso de negociación dun ERE de extinción, e sinalou que os traballadores, que estes días estiveron facendo garda nas instalacións, viron este luns con que a empresa cambiara este fin de semana as fechaduras “sen previo aviso”.
Segundo informou a CIG, os traballadores atopáronse con que non poden acceder ao interior da empresa e están a pasar a xornada “á intemperie”. Tras pór os feitos en coñecemento da autoridade laboral, a inspección levantou ” acta”.
O presidente do comité, Xabier Pérez, explicou que, ao chegar a Talleres Ganomagoga, o encargado tentou entrar como cada día pero non puido abrir a porta porque a fechadura estaba cambiada. “Chamamos á Garda Civil, pero dixéronnos que non era cousa deles “, relatou, e explicou que, nese momento, a CIG decidiu denunciar o ocorrido ante a Inspección.
Pérez explicou que ninguén comunicou ao persoal o peche das instalacións, a pesar de que moitos traballadores teñen obxectos persoais dentro e expresou o seu rexeitamento ás explicacións da empresa, que alega que pechou a nave para “protexer” a fábrica, despois de que aparecesen pintadas no exterior.
“Seguimos sendo traballadores da empresa, porque aínda non fomos despedidos”, sinalou o presidente do comité, que tacha o sucedido de “peche patronal en toda regra”. Así mesmo, lembrou que, aínda que Talleres Ganomagoga leva dúas semanas sen actividade, sen luz nin auga, o persoal desprazábase a diario ás instalacións.
A partir de agora, avanzou, seguirán facéndoo , aínda que terán que quedar no exterior do recinto. Así as cousas, só permanece aberta a fábrica que o grupo ten en Mos, xa que tanto os centros de Vigo como o do Porriño están pechados e o seu persoal atópase en situación permiso retribuído.
Mentres, os traballadores manteñen o seu calendario de protestas e ete luns concentráronse ás portas do Concello de Mos, onde entregaron un escrito para pedir, do mesmo xeito que xa fixeron nos outros municipios, a intercesión da corporación local ante as administracións.
