O alcalde de Vigo, iniciou este luns, con representantes do sector hostaleiro e dos taxistas da cidade, unha rolda de encontros para abordar a exclusión de Balaídos da lista de sedes do Mundial de Fútbol de 2030. En declaracións remitidas aos medios, o rexedor olívico explicou que, nestes encontros, trasladou a “importancia que o Mundial de Fútbol ten para a marca Vigo”, e engadiu que esa oportunidade “pretenden destruíla” a Xunta de Galicia e o PP, ademais do presidente da Real Federación Española de Fútbol (RFEF), Rafael Louzán.

O alcalde lembrou que ser sede do Mundial “é moi importante” para os hoteis, e tamén para o colectivo de taxistas e, segundo sinalou, os seus representantes así llo confirmaron. “Así que seguiremos reuníndonos con colectivos da cidade para seguirlles explicando quen quitou a Vigo como sede do Mundial, e esta confabulación política Louzán-Xunta-presidenta do PP de Vigo“, proclamou Caballero. O alcalde volveu a criticar que “Louzán segue calado, escondido e sen repor a Vigo como sede do Mundial”. “Vigo ten e demostrou méritos sobrados, e Vigo estaba na lista. Louzán, co apoio da Xunta de Galicia, co apoio do PP de Vigo, excluíu a Vigo como sede do mundial. E non nos imos a quedar calados”, insistiu.