A dirección xeral de Patrimonio Cultural, dependente da Consellería de Cultura, Educación, FP e Universidades, autorizou este martes ao Concello de Vigo a pór en marcha o proxecto de control arqueolóxico para musealizar e pór en valor a Fortaleza do Castro.
Así, o departamento autonómico respondeu ao documento achegado polo goberno local no que se remite o novo proxecto agora denominado ‘Control e seguemento arqueolóxico das obras de musealización e posta en valor da Fortaleza do Castro na Defensa de Vigo (Vigo-Pontevedra)’.
Segundo informou a Xunta de Galicia nun comunicado, a nova autorización de Patrimonio Cultural contén varios condicionantes como fotografar todas as unidades estratigráficas da intervención, con detalle dos elementos máis representativos, así como facer seccións e planos topográficos xenerais de resultados de control.
Ademais, os materiais arqueolóxicos que poidan aparecer, e demais documentación complementaria, depositaranse provisionalmente no Museo Municipal Quiñones de León de Vigo no prazo de seis meses.
