O alcalde de Vigo, Abel Caballero, xunto co director do Marisquiño, Joako Ezpeleta, e o organizador do Festival, Pity Domínguez, anunciou este sábado que as probas de skate do festival O Marisquiño realizaranse este ano na praia de Samil, sumando por tanto este espazo ao do porto.
O evento, que se celebra a segunda semana de agosto, retómase despois dos dous últimos anos de parón pola pandemia provocada polo coronavirus, polo que a última edición que celebrou foi en 2019, un ano despois do accidente que se produciu durante un dos concertos na zona portuaria.
No acto deste sábado, alcalde e organizadores explicaron que as actividades de skate levarán a cabo no aparcadoiro do centro da praia de Samil, polo que as vistas serán o mar e ás Illas Cíes. Ante esta nova localización, Caballero confirma unha nova filosofía no festival: “Que trema California, que imos a por eles”.
Esta redistribución dos escenarios do Marisquiño débese principalmente á necesidade de espazo para ampliar o número de asistentes, pero tamén á intención de conectar cun público interesado no skate como novo deporte olímpico. Por outra banda, os organizadores do Marisquiño sinalaron a importancia desta distribución de espazos co obxectivo de que haxa unha deslocalización, creando un retorno económico nas empresas da zona. A finalidade é cambiar a visión global de Vigo como cidade industrial para pasar a situarse nas axendas turísticas a nivel nacional e internacional.
PLAN DE TRANSPORTE E MOBILIDADE
Esta nova planificación do festival virá acompañada dun Plan de Transporte e Mobilidade específico por parte do Concello de Vigo en colaboración con Avanza, Vitrasa, Renfe e Mar de Ons para a coordinación mutua á hora de que os asistentes ao festival se poidan desprazar dunha maneira sustentable.
Por último, confirmaron a súa intención de ampliar os horarios, establecendo o festival de xoves a domingo para poder dedicar o xoves ás familias. Anunciaron a celebración de talleres para nenos, e que os propios circuítos estarán a disposición dos mozos de 8 a 14 anos para o seu uso ata as 20,00 horas da tarde do xoves.
Os organizadores desta cita declararon que esta expansión do Marisquiño ten as miras postas en 2025, ano no que o evento cumpre o seu 25º aniversario. Buscan “ser os mellores” e que o festival estea consolidado para ese ano como “o primeiro a nivel mundial”, apuntaron.
