O labor na difusión da lectura que realiza a Biblioteca Municipal de Ponteareas vén de ser recoñecido no Certame de Proxectos de Animación á Lectura María Moliner 2021. O xurado do premio destacou o mérito do programa “A biblioteca cerca de ti”, a través do cal se puxeron en marcha actividades, contacontos, obradoiros, clubs de lectura e encontros con escritores co obxectivo de difundir a lectura entre os veciños e veciñas.

Así, a Biblioteca de Ponteareas recibirá máis de 2.000 euros, que se destinarán a ampliar os fondos bibliográficos.

A campaña Animación á Lectura é un concurso dirixido a concellos de menos de 50.000 habitantes, que pon en marcha o Ministerio de Cultura e Deporte en colaboración coa Federación Española de Municipios e Provincias, a través do cal se premian os mellores proxectos ou actividades de dinamización da lectura desenvolvidas nas súas bibliotecas, co obxectivo de promover a lectura entre todos os colectivos sociais, especialmente entre os nenos e mozos, que constitúen a base dos futuros lectores adultos.

O concelleiro de Cultura da vila do Tea, Fernando Groba, felicita ao persoal “polo seu gran traballo” e sinala que dende o Concello “non pararemos de apostar por iniciativas para acercar á veciñanza ao pracer de ler”.