O Castelo de Santa Cruz da Guarda acolleu esta fin de semana a cuarta edición de «Noites no Castelo», coa actuación dos recoñecidos grupos de música Ardentía e Milladoiro, nunha noite na que acudiron máis de 3000 asistentes para gozar da boa música feita en Galicia nun entorno como é o Castelo de Santa Cruz, declarado Ben de Interese Cultural(BIC).
O grupo Ardentía foi o encargado de abrir esta edición de Noites no Castelo, cunha posta en escea na que o grupo involucrou ao público asistente dende o comezo da súa actuación con música tradicional galega que incorpora instrumentos que non adoitaban estar presentes nas formacións de música folk galega coma birimbau, clarinete ou requinta.
Pouco despois das 23:30h da noite un dos grupos máis importantes de Galicia, Milladoiro, fixo a súa aparición sobre o escenario de «Noites no Castelo». Esta formación, cunha traxectoria de máis de 35 anos, rememorou as mellores cancións dos seus 20 traballos discográficos e as novidades de “Atlántico” o seu último disco editado este mesmo ano e do que tocaron varias pezas.
