Tui conta cun importante patrimonio cultural, sendo este unha das súas principais sinais de identidade, así coma un dos seus destacados recursos turísticos. Precisamente, nestes días de corentena, o concello tudense publicou unha compilación de recursos accesibles en liña para visitar este patrimonio e afondar no seu coñecemento. 

Un destes recursos é o propio apartado dedicado ao turismo na web municipal www.tui.gal, onde hai información sobre o recursos patrimoniais culturais da cidade coa súa historia, imaxes e vídeos. Na Galería atopamos albumes de fotografías do Camiño Portugués, a Catedral de Santa María, o Conxunto Histórico, ou Tui dende o Ceo. 

Na canle de Vimeo do Concello de Tui pódense visionar distintos vídeos coma “Tui, cidade histórica, natural, monumental…”, “Tui, Porta do Camiño”, ou “Ruta Xudía”.

“Dende a Concellería de Patrimonio compílanse estes recursos on-line para mellorar o coñecemento dos recursos patrimoniais do noso municipio dende o convencemento de que este coñecemento implicará unha mellor valoración e conservación do mesmo”, apunta o concello nun comunicado. 

Ademais, lembra que cando remate este período de confinamento, Tui “estará agardando a todos os visitantes e turistas cunha acreditada oferta turística que, abofé, irá pouco a pouco recuperando normalidade á medida que se vaian levantando as medidas de confinamento”.