A exposición ‘Manuel Colmeiro. Espazos e encadres’, que acolle o Museo de Arte Contemporánea (Marco) de Vigo, foi inaugurada este venres co obxectivo de mostrar unha “visión máis contemporánea que historicista” da traxectoria e a obra do pintor, segundo trasladaron os organizadores.

En concreto, esta mostra, comisariada por Xosé Carlos López Bernárdez, foi producida polo museo olívico e está composta por unha selección de obras de diferentes coleccións e material documental. Deste xeito, ofrécese o produto dunha investigación e unha relectura do sentido, os obxectivos e a incidencia de Colmeiro.

Así, a exposición fai fincapé nos diálogos de Colmeiro con outros artistas, a súa inserción en correntes estéticas coas que conviviu e os diferentes espazos xeográficos e culturais onde desenvolveu a súa vida e a súa obra.

Precisamente, a mostra aborda a súa relación cos lugares nos que realizou as súas obras (Buenos Aires, París e Galicia) e estuda a súa contribución ao Movemento Renovador da arte galega ao presentar os seus traballos xunto aos doutros pintores do país, como Laxeiro e Virxilio Blanco, e doutros países.

EIXOS ESPAZO-TEMPORAIS

Así mesmo, a exposición traza varios eixos espazo-temporais e repasa a traxectoria do pintor silledense, que percorre desde a súa formación en Arxentina ata o seu regreso a Galicia ao longo de cinco seccións. Así, incidiuse nos debuxos de guerra do artista e na súa implicación en debates relacionados con Europa e América.

O realismo de Colmeiro e Os Novos foi a dirección que predominou a vangarda en Galicia a principios do século XX e estivo marcada por unha intención de que o traballo artístico reflectise a esencia do galego sen abandonar a modernidade. Así, estes autores coinciden con outros movementos xurdidos na Europa do período de entreguerras ao sentirse herdeiros dunha tradición e querer profundar no patrimonio, o que implica a súa modernización.

HORARIOS DE APERTURA

A mostra estará exposta ata o 24 de maio nas salas frontais da primeira planta do museo e as persoas interesadas poderán visitala de martes a sábados, festivos incluídos, de 11,00 a 14,30 horas e de 17,00 a 21,00 horas. Mentres, o horario de apertura dos domingos estará comprendido entre as 11,00 e as 14,30 horas.

Con motivo da apertura da exposición, editarase ademais un catálogo cun estudo do comisario, a reprodución das obras da exposición e documentación obtida durante o proceso de investigación que permitiu levala a cabo.