Os debuxos, calendarios, firmas e proclamas dos presos que, durante a Guerra Civil, escribiron nas paredes do mosteiro de Santa María de Oia foron recuperados e formarán parte dunha exposición que este sábado foi inaugurada no complexo e que permanecerá aberta ata o 15 de decembro.
Trátase dunha mostra que pretende ser unha homenaxe ás máis de 5.000 persoas que, traídas desde toda da xeografía española, foron encarceradas en Oia entre os anos 1937 e 1939.
Nas paredes de xeso deste mosteiro con máis de 800 anos de historia, os presos plasmaron os seus recordos, angustias e creatividade que, a través dun preceso de extracción e restauración, agora se recupera para a súa posta en valor.
Durante máis de 1.500 horas de traballo dun equipo especializado supervisados por expertos de Patrimonio rescatáronse os grafitos da época na que Oia serviu de cárcere para o bando franquista. Trátase, en palabras dos actuais propietarios do complexo, da “maior actuación de recuperación da memoria histórica en Galicia”, para a que se investiron 300.000 euros.
Durante a inauguración deste sábado, proxectouse un vídeo no que un dos presos do mosteiro, o catalán Joan Salvador, de 98 anos, deu voz a eses miles de persoas que estiveron encerradas no lugar entre os anos 1937 e 1939. De feito, relata como visita “regularmente” o Real Mosteiro desde os anos 50 porque supón un “san exercicio de memoria“.
Ademais del, diversas autoridades, empresarios e membros da vida social e cultural de Galicia participaron na súa inauguración. A alcaldesa de Oia, Cristina Correa, agradeceu á propiedade do mosteiro o traballo de todos estes anos “para pór en valor todo o patrimonio deste municipio, así como a súa implicación na memoria histórica”.
Pola súa banda, o director xeral do Real Mosteiro, Xoán Martínez, reivindicou a “importancia” da historia e da memoria desta infraestrutura e destacou distintas accións culturais levadas a cabo como visitas guiadas, charlas, concertos e talleres, entre outras. O acto estivo amenizado pola música da cantautora Su Garrido.
