Este 25 de xullo, coincidindo co Día Nacional de Galicia, lanzábase a través das redes sociais e da plataforma Youtube o videoclip “No podrán contigo Ahed” dedicado á moza Ahed Tamimi, militante palestina detida por Israel.
O tema musical é unha idea do escritor e político galego Lois Pérez Leira, que compuxo unha poesía que musicou o artista vigués José Antonio Alcalde “Tono Alcalde”. A canción mencionada será interpretada posteriormente noutros idiomas, especialmente en árabe.
O proxecto naceu o mesmo día que detiveron a Ahed. “Indignoume a actitude represora do goberno sionista de Israel. Púxenme a escribir con rabia. E cando a tiña terminada chamei por teléfono a Tono Alcalde, que estaba de xira por Rusia e pedinlle que si me podía compoñer a canción”, apunta Pérez Leira.
Con esta iniciativa preténdese “chamar a atención da opinión pública internacional do xenocidio que está cometendo Israel, contra o pobo palestino”, destaca. “Creo que unha canción pode ser máis contundente que outras formas de denuncia. Este é o noso grao de area”, engade.
