O cantante galego Iván Ferreiro actuará no auditorio de Castrelos de Vigo o próximo 15 de agosto, segundo anunciou este martes o alcalde da cidade, Abel Caballero, nun audio remitido aos medios de comunicación. O rexedor destacou a figura do “gran Iván Ferreiro”, ao que definiu como un artista “extraordinario” seguido por miles de persoas.

Caballero explicou que tiña “un especial interese” en que o músico vigués formase parte da programación de concertos de Castrelos, un dos escenarios máis emblemáticos do verán na cidade. Segundo indicou, moitos cidadáns levaban tempo reclamando a presenza de Iván Ferreiro no auditorio, algo que, segundo dixo, lle trasladaron en numerosas ocasións. Con este anuncio, o artista súmase á lista de actuacións previstas para este verán en Castrelos, un ciclo de concertos que cada ano reúne a miles de persoas no parque vigués.