O padroado da Fundación Laxeiro decidiu outorgar o Premio Laxeiro 2026 á escritora viguesa An Alfaya, segundo anunciou o presidente da devandita entidade e alcalde de Vigo, Abel Caballero.

Nun audio difundido aos medios de comunicación, o rexedor destacou a traxectoria de Alfaya no ámbito da literatura infantil, xuvenil e adulta. Así, puxo en valor que as súas obras, escritas en galego, foron traducidas a multitude de idiomas como o castelán, o catalán e o inglés. Tamén se referiu a a participación de Alfaya na fundación do Teatro Avento de Vigo.

“As nosas felicitacións a An Alfaya, unha escritora certamente sensacional”, subliñou Caballero, engadindo que recibirá o seu premio no mes de febreiro.