As entradas para o concerto que Víctor Manuel ofrecerá no auditorio de Castrelos de Vigo sairán á venda este venres, día 26 de xullo, segundo anunciou o alcalde, Abel Caballero. Como vén sendo habitual este verán, o Concello ofrece 5.000 pases para a platea do auditorio, mentres que o resto das persoas que queden sen reserva poderán acudir de forma gratuíta á bancada.
En concreto, 2.000 entradas sairán de forma presencial nos despachos de billetes de Castrelos a partir das 09.00 horas e outras 2.000 ás 16.30 horas. Na web, 500 estarán dispoñibles á mañá e outras 500 á tarde. Caballero celebrou que esta forma permite que a maioría dos pases sexan adquiridos por vigueses, xa que é o goberno local quen organiza e paga aos artistas, pondo entradas a un prezo de entre 10 e 15 euros, dependendo da actuación.
