A delegada territorial da Xunta en Vigo, Ana Ortiz, deu este luns a benvida aos participantes no evento ‘Destino Galicia’, que reúne durante dous días a 30 catadores de toda España na cidade olívica. “Sodes os mellores difusores do noso patrimonio gastronómico e grazas a vós a calidade dos nosos produtos traspasa todas as fronteiras”, sinalou Ortiz durante a recepción celebrada na Delegación Territorial.

O congreso, tal como explicou a Xunta nun comunicado, consiste na visita de 30 catadores do territorio nacional (tanto en activo como en último ano de estudo) para poder facer un percorrido polos produtos da Comunidade e así converternos en embaixadores da gastronomía galega. Os participantes realizarán a visita a dúas das zonas máis importantes do viño de Galicia. Ademais, recibirán unha clase maxistral acerca das calidades de dez zonas de viño galegas e as súas características. A Asociación de Catadores de Galicia (Agasu) é a encargada de realizar este evento, en colaboración co Executivo autonómico.