A Real Filharmonía de Galicia participará nun encontro en Vigo con persoas abonadas á Tempada de Clásica de Afundación e público xeral para escoitar as propostas e as impresións sobre o seu repertorio e os seus recitais “con vistas a seguir incidindo na apertura a novos públicos”.

Segundo explican nun comunicado, neste foro participarán o director titular e artístico da Real Filharmonía de Galicia, Baldur Brönnimann, e a directora técnica, Sabela García Fonte, quen tamén animarán a debater sobre o futuro das orquestras. O encontro terá lugar este martes 12 de marzo, ás 19.00 horas, no Auditorio do Teatro Afundación (entrada pola rúa Marqués de Valladares). A entrada é libre ata completar o aforamento.