O festival SonRias Baixas puxo á venda os abonos para a celebración da súa 21ª edición en Bueu, os próximos 1, 2 e 3 de agosto, encabezada por La Oreja de Van Gogh e Tanxugueiras. Os abonos xa están dispoñibles desde a web do festival, www.sonriasbaixas.info, e a través de Enterticket.es. Os 500 primeiros compradores poderán obter as súas entradas por 45 euros máis gastos de xestión.
Esta edición estará encabezada por nomes como La Oreja de Van Gogh, Tanxugueiras, Rozalén, Ginebras, Álvaro de Luna ou Rayden, nunha aposta da organización, a promotora PlayPlan, para “tratar de cambiar a tendencia marcada pola propia industria musical, e apostando por un forte protagonismo das bandas lideradas e formadas por mulleres como nomes principais do cartel”.
Tamén se mantén unha forte representación da escena musical galega, con nomes como Fillas de Cassandra, Mondra, Sabela ou The Rapants, encabezada pola punta de lanza deste auxe que está a vivir o panorama galego, como son Tanxugueiras. A todos estes nomes súmanselles as interesantes propostas de Chef’Special, La La Love You, Anabel Le, Cool Nenas, Emlan, Gilipojazz, Inés Hernand, La Élite, Morochos, Mr. Kilombo, Muerdo, Sexy Zebras e Travis Birds, “mantendo así a tendencia do festival de ser un altofalante para coñecer novas propostas musicais”.
