O conselleiro de Cultura, Educación, Formación Profesional e Universidades, Román Rodríguez, puxo en valor a figura da fotógrafa Mary Quintero e a súa “pisada na historia colectiva” de Galicia. Así o sinalou este mércores na presentación do catálogo da mostra ‘A imaxinación no interior dun estudo: o fondo Mary Quintero’, unha exposición que se despide este venres no Museo do Mar de Galicia, en Vigo.
“Para os que non se poden achegar a coñecer este traballo, lanzamos o catálogo, co que descubrir máis sobre a fonda pisada de Mary Quintero na fotografía, pois é tamén unha parte da nosa historia colectiva”, afirmou Rodríguez, segundo recolle a Xunta nun comunicado. A colección pertence ao fondo de Mary Quintero do Arquivo Histórico Provincial de Pontevedra e conta con 50 fotografías e negativos asociados, así como fotos e planos sobre o edificio pontevedrés do arquivo e da xestión documental que realiza nos seus fondos.
Mary Quintero naceu en Melide en 1931 e en maio de 2022 legou a súa produción fotográfica ao arquivo pontevedrés, incluíndo os seus inicios na fotografía ata o seu paso pola publicidade. Segundo o conselleiro, a artista “escribiu un dos máis importantes capítulos da historia da fotografía galega”, sendo a única muller da industria fotográfica en congresos durante moito tempo.
