Escritoras e artistas visuais galegas reuniranse este xoves, día 2 de novembro, no Museo Marco de Vigo nun recital perfo-poético a favor da igualdade e en contra da violencia contra a muller. Esta iniciativa, organizada pola Delegación do Goberno en Galicia, enmárcase dentro da programación ao redor do 25 de novembro, Día Internacional contra este tipo de violencia.
Nun comunicado, o Executivo explicou que este recital pretende visibilizar o papel da cultura, neste caso da literatura, na sensibilización da sociedade contra o machismo e contra calquera forma de violencia de xénero. Faino nesta ocasión coas voces das propias escritoras, que escollerán os textos que mellor reflicten esta visión do empoderamento feminino.
Baixo o título de ‘Traga’, a acción combinará o recital de varias voces femininas recoñecidas da poesía galega cunha performance visual da artista Ana Xesto. A presentadora do acto será Yolanda Castaño, recentemente galardoada co Premio Nacional de Poesía.
OUTRAS INICIATIVAS POLO 25N
Con varias iniciativas ao longo destes días por toda Galicia, os actos centrais serán a semana do 25 de novembro, comezando coa entrada dos recoñecementos ‘Meninas’ en Santiago, que concede a Delegación a entidades e persoas que destacan en Galicia pola defensa da igualdade e a protección de mulleres vítimas de violencia machista. Será o martes 21 no Hostal dos Reis Católicos. O 24 de novembro, na Coruña, a Delegación acollerá a lectura do manifesto institucional contra a violencia machista.
